Wetin People Fit Relate To Na Wetin I Dey Sing – Kizz Daniel

Afrobeats hitmaker, Kizz Daniel don open up say for him music matter, no be to just make am sweet for ear, na to make sure say people fit feel am deep for body.

Wetin People Fit Relate To Na Wetin I Dey Sing – Kizz Daniel

For one post wey him drop for him Instagram story, Kizz Daniel reveal say the most important thing for him when e dey create music na how people go relate to am.

According to the hitmaker, e no matter the genre or the person wey produce the song — as long as people fit connect with wetin e dey talk.

Him write:
“I no dey do music just to make am fine for ear. No be by say ‘make e sound sweet’.
One rule: make people fit relate.
Even if na Segun from Ikorodu produce am, as long as the message dey touch people wey e suppose touch.”

Kizz Daniel don always dey known for this kind style — him songs dey carry strong lyrics and sweet melody wey both young and old dey feel.

E sabi mix correct street gist, simple language, and melody wey dey easy to sing along — na why him music dey always blow.

Since him break into limelight for 2014 with that jam ‘Woju’, Kizz Daniel don become one of Naija top hitmakers.

One of him recent relatable jams na ‘Twe Twe’, wey TurnTable Chart name as Number 1 song of 2024, show say di song really capture fans heart.

This one don make am the second time Kizz Daniel go end year with number one song — the first time na for 2022 when ‘Buga (Lo Lo Lo)’ scatter everywhere both home and abroad.