Destalker Don Confirm Say Im Marriage Don Scatter 

Popular Naija comedian, Destalker, don finally open up say im marriage don scatter. The funny man wey always dey hide him personal life, drop the tori for recent interview with content creator Timi Agbaje.

Destalker Don Confirm Say Im Marriage Don Scatter

Even though the marriage don end, Destalker talk say him still dey happy. “I dey happy. My home dey peaceful. I bin marry before, but no be so again. Marriage no be the full package for happiness,” he yarn.

As dem ask wetin cause the breakup, Destalker talk say na “irreconcilable differences” scatter the union. He reveal say dem marry for three years after just six months of dating.

He add: “Na the difference between man and woman be that. If I wan marry again next week Friday or Saturday, I fit do am. But woman no fit just decide like that. Na man dey decide marriage.”

When dem ask whether love still dey him mind, the comedian clear ground say he no dey interested in relationship for now. He still talk say marriage dey benefit women pass men.