ID Cabasa: Creativity No Get Full Stop!

ID Cabasa -“Unfinished Business” No Go Ever Finish!

By:Ezurumem Obinna

OG Producer ID Cabasa  don  siddon with Yanga FM and scatter everywhere with the kind tori wey im talk. The baba don tell us say im album “Unfinished Business” no go ever finish  and before you vex, make you hear wetin im talk first!

The Album Wey No Get End

“Unfinished Business no go ever finish,” Cabasa yarn am clear clear, and person fit think say na cruise. But no be so o! The legend talk say as long as creativity dey im body, im go continue dey add music for the album. E be like say the project na living thing wey dey grow everyday. Na correct dedication to the work be that!

December Reload: When Baba Bring Fire

Now, make we talk the real gist. Last year December, Cabasa show us say him  no dey play at all. The man re-imagine the whole “Unfinished Business” album and drop better bangers wey make people dey ask for more!

ID Cabasa

E pack the thing with heavy weights from Olamide ,Ayo Maff, Vector da Viper, Pheelz (Mr Producer), and Liya all show face for the project. Omo, the lineup alone na selling point! But e no stop there o. Baba also bring back some classic Afrobeats bangers wey go make you remember say music sweet before before.

 E be like say im dey blend the old and the new, mixing nostalgia with the current vibe wey dey burst brain.

9ice Tori: The Gist Wey Shock Everybody

You sabi 9ice abi? The “Gongo Aso” master? Omo, come hear gist! Cabasa don open mouth  say originally, 9ice been dey write song for other people. Him just dey do backend, dey write fire for other artiste make dem sing.

Cabasa talk say 9ice been dey write plenty hits for different people until one day im just decide say “Abeg, make I sing am myself.” Chai! From writer wey nobody sabi to superstar  na heavyweight promotion be that!

Why This Whole Thing Make Sense

For this world wey everybody dey rush rush, dey chase deadline, Cabasa own different. The way him take re-imagine the album last December show say Cabasa no dey cap when im talk say creativity no get expiration date. Na say real art no dey ever stop to grow and change. Today na Vector and Ayo Maff, tomorrow e fit be another set of artiste wey go help am add more sauce to the album. E be like software update wey dey happen every time  “Unfinished Business 2.0, 3.0, 4.0…” The thing no get stopping!

And honestly, with the way December version sweet, we dey wait to see wetin Cabasa go cook next. If that one na “unfinished,” abeg make e no finish o!