Na Small E remain Make Stray Bullet Touch Seun Kuti For U.S

Nigerian Afrobeat musician, Seun Kuti, nearly run enter gbege for Yankee after stray bullet enter him hotel room.

Na Small E remain Make Stray Bullet Touch Seun Kuti For U.S

Seun post the tori for him Instagram on Sunday evening, show as bullet scatter him hotel window just like that. For the video, e show the broken glass and talk how the thing just fly enter from nowhere.

“I read somewhere say na these people be the civilized ones,” Seun talk.
“Tell me say you dey America without telling me say you dey America. I just dey my hotel room dey chill, na so I hear boom — this happen.”

The thing shock am well. He thank God say e no stand for where the bullet pass.

Seun dey U.S. now for some events and show. After e post the video, fans and fellow celebs rush go him comment section to thank God for am and show support.

Till now, police never talk anything about wetin happen. Nobody know where the bullet come from or whether dem go investigate am.

Seun Kuti no dey carry last when e come to talk matter wey concern society and politics. This kain thing fit make am talk again soon. The whole matter don still raise eyebrow on top the gun wahala wey dey disturb America.